II Seminario Internacional pola Abolición da Tauromaquia. 19 e 20 de Xuño / A Coruña

Os vindeiros días 19 e 20 de Xuño, no Pazo de Exposicións Kiosko Alfonso da Coruña, realizaremos o II Seminario pola Abolición da Tauromaquia, evento que ven organizando a plataforma Galicia, Mellor Sen Touradas dende o ano 2008.

Neste segundo seminario é fundamental a asistencia, e por iso durante dous días ofreceremos debates e relatorios con expertos mundiais, e de contido moi interesante.

O 19 faranse dous debates, un con partidos políticos e o segundo coas organizacións xuvenís de ditas formacións políticas. A finalidade é dar voz a estas ideoloxías políticas e que amosen a súa posición fronte á tauromaquia.

No día 20 teremos varios relatorios sobre política, ética e comportamento animal; a cargo do eurodeputado Raül Romeva, o doutor en filosofía Óscar Horta e o etólogo Jordi Casamitjana.